Sarraskiaren ikur bilakatu ziren bi hirik elkar hartu dute, haien zama sinbolikoa biolentzia prebenitzeko eta bizikidetza sustatzeko tresna bihurtzeko. Gernika-Lumok eta Oswiecimek izenpetu dute adiskidetze ituna. Bakearen eta memoriaren alde egin asmo dute.
Oswiecim Poloniako hiri bat da. Han jarri zuten naziek kontzentrazio esparrua, hiriaren alemanezko izenez ezagutzen dena: Auschwitz. Datu ofizialen arabera, 1.300.000 pertsona deportatu zituen Hitlerren erregimen naziak kontzentrazio esparru hartara. Haietariko 900.000 gatibu gasarekin hil zituzten hara iritsi ahala. Aldiz, Gernika-Lumon 1937ko apirilaren 26an izan zen gerrako sarraskia. Azoka egun batez, 10.000-12.000 pertsona inguru zeudela, airez bonbak jaurti zituzten hegazkin naziek, Franco diktadorearen eskutik. Eusko Jaurlaritzaren arabera, 1.654 pertsona hil zituzten, eta hiriaren %85a txikitu.
Sarraskiak eta saminak lotutako bi hiriek adiskidetze akordio bat prestatzeko ituna izenpetu dute gaur. Gernika-Lumoko alkate Jose Mari Gorroñorekin batera egon dira Janusz Chwierut Oswiecimeko alkatea eta Monika Krzepkowska Poloniako enbaxadorea.
Adostu dute plan bat egitea bakea, giza eskubideak eta balio demokratikoak sustatzeko. Horretarako lantaldeak osatuko dituzte bi hirietako ordezkaritzekin. Eragile kulturalekin, gazteekin eta hezkuntza eragileekin trukeak egin asmo dituzte, besteak beste.
