Gazteen %15ek darabilte bereziki euskara Interneten

Gazteen Euskal Behatokiak Araban, Bizkaian eta Gipuzkoan egindako ikerketa baten arabera, 15 eta 29 urte bitarteko gazteen %15ek diote bereziki euskara erabiltzen dutela sare sozialetan. Adin horretako gazteen %81,5ek bereziki gaztelania darabilte, eta %3,3k, berriz, ingelesa. Adinarekin batera igo egiten da sare sozialetan nagusiki euskara eta ingelesa erabiltzeko joera.

Lurraldearen arabera, euskara darabiltenen portzentajea aldatu egiten da. Gipuzkoan gazteen %30ek euskara erabiltzen dute batez ere txatean idaztean edo sare sozialetan edukiak argitaratzean; Araban eta Bizkaian, gazteen %3,5ek eta %8,4k.

Gazte euskaldunei, hau da, euskaraz oso ondo edo nahiko ondo hitz egiten dutenei erreparatuz gero, sare sozialetan batez ere euskaraz aritzen direnen portzentajea %18,4raino igotzen da. Kasu horretan ere altuena Gipuzkoan dago:%32,6. Bizkaian eta Araban gazteen %10,8 eta %5,1 aritzen dira nagusiki euskaraz. Azken datuak aztertzeko orduan, beste faktore bat ere hartu behar da kontuan. Izan ere, norberaren ezagutzaz gain, aintzat hartzekoa da sare sozialetan mintzakide dituzten pertsonenezagutza ere.