Gernika-Palestina plataformak zenbait mobilizaziotara deitu du gaurko, Palestinari elkartasuna adierazteko eta «berehalako» su etena aldarrikatzeko. Iaz Donostian egin zuten lehen mobilizazio nazionalaren urteurrenaren karira deitu du elkarretaratze horietara. Eguerdian, sindikatuek eta hezkuntza komunitateko kideek egin dituzte protestak, eta, 19:00etan, herri guztietan elkarretaratzeak egiteko deia zabaldu du plataformak; 178 herritan eginen dituzte, antolatzaileek jakinarazi dutenez.
Sindikatuek Euskal Herriko langile klaseari egindako deiari erantzunez, hamaika herritar bildu dira eguerdian Iruñean, Bilbon, Gasteizen, Tuteran zein Donostian egin dituzten elkarretaratzeetan. Sindikatu ia guztiek egin dute bat: ELA, LAB, EAEko eta Nafarroako CCOO eta UGT, ESK, CGT, LKN, Steilas, Solidari, EHNE Nafarroa, Etxalde eta Hiru.
Besteak beste, salatu dute Israelek 42.000 palestinar baino gehiago hil dituela iazko sarraskia hasi zuenetik, eta Gazako azpiegituren %70 suntsitu: «Inoiz gertatu den genozidiorik krudelenetako baten lekuko gara, eta, halere, nazioarteko komunitateak ez du izugarrikeria hau amaitzea lortu». Halaber, Israelek Libanoren aurka hasitako oldarraldia ere gaitzetsi dute: «Israelek Libanori eraso eginda, milaka hildako eta suntsipen gehiago eragingo duen urratsa egin du; non eta nola amaituko den ez dakigun kiribila abiatu da».
«Palestinak gure elkartasuna behar du, baina batez ere konponbideak behar ditu. Ezin dugu Palestina bakarrik utzi». Horregatik, bereziki, gatazkari konponbidea emateko bide diplomatikoak ireki behar direla azpimarratu dute: «Berehalako su etena eta kolonizazioaren zein okupazioaren amaiera lortzeko bide diplomatikoak ireki behar dira, baita eskubide nazionalak erdigunean jarriko dituen ebazpen politiko integrala lortzeko ere».
Israelekiko konplizitate oro amaitzea ere eskatu dute. «Langile klaseari eskatzen diogu presio neurri guztiak aktibatzen jarrai dezagun, Israelek Nazio Batuen Erakundearen ebazpenak errespeta ditzan eta eskualdean bakea eta egonkortasuna lortu daitezen». Erakundeei ere bidali diete mezua: «Apartheidaren, gizartearen aurkako krimenen eta herri palestinarrak pairatzen duen genozidioaren konplize izateari utz diezaioten eskatzen diegu».
