Gasteizen adingabe bati egindako sexu eraso bat ikertzen hasi da Ertzaintza. Segurtasun Sailak azaldu duenez, adingabeak salaketa jarri duelako abiarazi dute ikerketa, eta Ertzaintzak jakinarazi du oraingoz ez duela inor atxilotu, auzia ikerketa fasean baitago.
Biktima adingabea denez, haren «segurtasuna eta eskubideak bermatze aldera», kasuaren inguruko xehetasun gehiagorik ez dute emango ikerketa abian den bitartean, Segurtasun Sailak adierazi duenaren arabera. Bestalde, horrelako kasuei «erabateko lehentasuna» ematen dietela gaineratu dute oharrean.
Segurtasun Sailak gaur jakinarazi duen kasua, ordea, ez da azken egunetan Gasteizen izan den bakarra. Izan ere, Ertzaintza 35 urteko gizon bat ikertzen ari da astelehenetik, alabari sexu erasoak egin izana leporatuta.
Biktimak familiari kontatu zion zer gertatu zen, eta senideak Poliziarengana joan ondoren atxilotu dute gizona. Gaur eramango dute epailearen aurrera, eta, ezustekorik ezean, behin-behineko atxiloaldia ezarriko diote.
