Burgos (Espainia) eta Gasteiz arteko AHTa atzeratuta dago euskal Y-arekin alderatuta, eta horren seinalea da oraindik ez dutela zati bat bera ere lizitatu. Bada, Espainiako Garraio eta Mugikortasun Ministerioak gaur esan du beranduenez bi hilabete barru lizitatuko dutela lehen zatia, Pancorbo eta Ameyugo artekoa (Espainian dena). Jose Antonio Santano Espainiako Mugikortasun eta Garraio Jasangarriko Estatu idazkari eta Irungo (Gipuzkoa) alkate ohiak iragarri du, eta gehitu 2025ean egingo dutela gainontzeko zati guztien lehiaketa publikoa.
Espainiako Gobernuko eta Eusko Jaurlaritzako ordezkariek egindako bilera baten ostean iragarri du hori Santanok. Horrez gain, azken urteetako lanen bilakaeraren balorazioa egin dute, Arkautiko loturaren akordioarena, esaterako. Bestalde, adostu dute datozen asteetan azken akordioak sinatuko dituztela Arkautiko lotura egin ahal izateko.
