Etxerat elkarteak jakinarazi duenez, Garikoitz Aspiazu euskal presoa Lannemezango espetxetik (Okzitania) Martutenera (Gipuzkoa) lekualdatu dute. Aspiazu 2008an atxilotu zuen Frantziako Poliziak, Cauteretsen (Frantzia), Lourdestik hurbil, eta Lannemezango espetxean zegoen preso, Euskal Herritik 290 kilometrora. Hala, azaroan hamasei urte egingo ditu espetxean. Aspiazuk egindako eskaera baten ondorio da Euskal Herriratzea, eta Frantzian ezarritako zigorra Euskal Herrian betetzea du xede.
Aspiazuren Euskal Herriratzearekin, bost dira Frantziako Estatuko kartzeletan dauden euskal presoak: Arkaitz Agirregabiria, Iñaki Esparza, Javier Abaunza eta Mikel Karrera Lannemezanen daude preso, eta Saioa Sanchez, berriz, Reaun, Euskal Herritik 890 kilometrora.
