Garapenerako lankidetza sustatzeko 1.299 egitasmo lagundu zituzten iaz Arabako, Bizkaiko eta Gipuzkoako erakunde publiko nagusiek. Orotara, 83,6 milioi euro bideratu zituzten; 2022an lankidetzarako bildu zen kopurua baino %2,8 gehiago. Diru hori 65 herrialdetako 361 erakundek kudeatu zuten, beren proiektuak garatzeko. Euskal Lankidetza Publikoaren Atariak kaleratu ditu datu horiek, Euskal lankidetza zenbakitan txostenean.
Lankidetzarako funtsaren zatirik handiena Amerikako herrialdeetara bideratu zen iaz —%51,65—; batez ere, Guatemala, Kolonbia, El Salvador eta Perura. Funtsen laurden bat Saharako Errepublika Arabiar Demokratikoak jaso zuen, eta diruaren %4,5 Palestinako krisi humanitarioari erantzuteko erabili zen. Araban, Bizkaian eta Gipuzkoan ere sustatu zen lankidetza baliabide horiekin. Gizarte eraldaketarako hezkuntza proiektuak eta Ukrainako errefuxiatuei laguntzeko egitasmoak finantzatu ziren.
Txostenak bigarren urtez aztertu du lankidetza erakunde publikoek 2030eko Agendari egiten dioten ekarpena. Agendaren garapen jasangarriko helburuetan, gizon eta emakumeen arteko berdintasunari eta emakumeen ahalduntzeari egin diote ekarpenik handiena —%27—; bigarren tokian bakea, justizia eta erakunde sendoak sustatzeko helburua dago —%19,4—, eta hirugarrenean, desberdintasun sozialak murriztekoa —%9,5—.
Funtsa elikatzeko baliabideak Arabako, Bizkaiko eta Gipuzkoako erakunde nagusiek jarri zituzten. Eusko Jaurlaritzarena izan zen ekarpen handiena: %69koa. Diru poltsa osatu zuten Arabako, Bizkaiko eta Gipuzkoako foru aldundiek, eta Bilboko, Gasteizko, Donostiako eta Zarauzko udalek.
