Gaitasun handiko ikasleei ikasketa prozesua zukutzen laguntze aldera, abian du Eusko Jaurlaritzako Hezkuntza Sailak Zur-ekin izeneko programa, eta, gaur Begoña Pedrosa Hezkuntza sailburuak jakinarazi zuenez, indartu egingo dute: martxan jarri berritan, lehengo ikasturtean, 50 ikaslek izan zuten programan murgiltzeko era, eta, ikasturte honetan, 125 izango dira.
DBHko 3. eta 4. mailako eta Batxilergoko lehenengo mailako ikasleentzako programa da. Deustuko Unibertsitatearekin batera ari da Eusko Jaurlaritza bideratzen, eta helburu nagusia da ikasleei beren ikasketa prozesua hobetzeko «erremintak» ematea. Mentoreen laguntza izaten dute horretarako.
Propio hainbat jakintza arlotako hamalau mentore ari dira programan parte hartzen. Pedrosaren arabera, «talentuak» atzematea da programaren helburuetako bat, baina, betiere, ikasleei behar duten laguntza eskainita. Ikasleek, mentoreekin dituzten hartu-emanei esker, «esperientzia eraldatzaileak» izan dituztela esan du sailburuak, eta familientzat ere aski lagungarriak direla.
