Dagoeneko itsasadarra zeharkatzen hasia da gabarra, goizeko lehen ordutik. 04:30ean, Portugaletetik atera dira portuko amarratzaileak, eta Bilborantz jo dute gabarra prest jartzeko probei ekiteko. Atzo uretaratu zuen ontzia, eta gaur goizean dena prest zegoen, gabarrak lehen metroak egiteko. Bilbotar gutxi batzuen begiradapean hasi da nabigatzen, goizeko seiak eta laurdenetan, hain zuzen.
Goiztiarrenek bakarrik izan dute pribilegioa ontzi horrek azken hamarkadan etxetzat izan duenari agur nola esan dion ikusteko. Atoiontzi batek eramango du gaur Bilboko Portura, eta bertan itxarongo du ostegunean Areetako Abra itsas klubera eraman arte. Aurretik, udaletxetik igaroko dira, eta probak egingo dituzte dena behar bezala dabilela egiaztatzeko.
Txapeldunak Areetako kaitik Bilboko udaletxera eramango dituen ontzia 1960an eraiki zuten Celaya ontzioletan, Bilboko Portu Autonomoaren enkarguz, gaur egun Portu Agintaritza dena. Plataforma flotatzailea da, propultsiorik gabea, eta, beraz, ontzi bat behar da hura bultzatzeko eta beharrezko maniobrak egiten laguntzeko. Hortaz, hiru nabek beteko dute lan hori.
Misioaz arduratzen den enpresa Remolcadores Ibaizabal da, eta ibilbidea osatzeko behar diren baliabide guztiak eskaintzen ditu. Izan ere, Bizkaiko uretan egiten dituen lanetan erabiltzen dituen atoiontziak ez dira egokiak lan hori egiteko, eta, azkenik, Pasaiako portuko Facal Once atoiontziak tira egingo dio gabarrari.
