Oroimen kolektiborako gune izan da gaur Lagran (Araba); izan ere, frankismoak errepresaliatutako guztiak oroitzeko ekitaldia egin dute. Urtzi Gantzarain alkateak adierazi duenez, omendu nahi izan dituzte «egiaren alde lan egin zutenak», eta gogoan izan «hainbeste min eragin eta inpunitatez jokatu zutenei aurre egin zietenak». Horrez gainera, memoria gordetzeko konpromisoa azaldu du. Oroigarri bat inauguratu dute, haien omenez.
Gantzarainek salatu du urte asko igaro direla isiltasunean, eta isiltasun luze horrek ez duela laguntzen ez justizia egiten, ezta eragindako mina arintzen ere; «gure etxeko paretetan, gure herriko lurretan eta jendearengan itsatsita dago».
Ekitaldian parte hartu dute Feliz Ozaeta Fernandezen senideek. Duela 88 urte hil zuten, exekutatuta. Harekin batera, beste sei pertsona hil zituzten. 1936ko altxamendu militarrari aurre egin zietelako errepresaliatu zituzten.
