Ezker Anitza-IUk datozen lau urteetarako estrategia politikoa definitzeko XI. batzarrerako prozesua ireki du. Ekainaren 22an amaituko dute, zuzendaritza kolegiatu berria aukeratuta. Gaur egun Isabel Salud da koordinatzaile nagusia.
Araba, Bizkai eta Gipuzkoako koordinakundea da Ezker Anitza-IUrena. Bi ardatz nagusi izango dituzte eztabaidarako: nazioarteko olatu atzerakoiari aurre egiteko estrategiak lantzea, eta Ezker Anitza-IU indartzea, sinetsita baitaude «ezkerraren espazioaren birkonfigurazioan ezinbesteko rola» duela.
Iazko Eusko Legebiltzarrerako bozetan Sumar alderdiarekin aurkeztea erabaki zuten, eta ordezkari bakarra lortu zuen koalizioak legebiltzarrerako: hain zuzen, Ezker Anitza-IUko Jon Hernandez. Aitzitik, 2023ko udal eta foru hauteskundeetan, Elkarrekin Podemos-ekin aurkeztu ziren. Koalizio horrekin aurkeztuta, Arabako Batzar Nagusietan lortu zuten ordezkari bat: Jose Damian Garcia-Moreno Lopez. Udaletan Ezker Anitza-IUko sei zinegotzi dituzte, Elkarrekin Podemos eta Aliantza Berdeak taldearekin batera aurkeztuta.
