Ez du oztoporik elkargoak

Erran daiteke: Hirigune Elkargo bakarra sortzeko gidaritza batzordeak epeak errespetatzen baditu, 2017ko urtarrilaren 1ean Ipar Euskal Herriko lehen instituzio propioa sortuko da. Elkargoaren kontrakoek jarritako berehalako epai eskaerak baztertu zituen atzo Paueko Administrazio Auzitegiak (Okzitania), Hirigune Elkargoa sortzeko gelditzen zen oztopo juridiko bakarra kenduta.

Joan den astean iragan zen auzia Pauen. Elkargoaren kontrakoek egitura «neurrigabe eta teknokratikoa» salatu zuten, «munstro administratibo bat» sortzera zihoazela deitoratuta. Sakoneko helegitea aztertu bitartean, prozedura guzia bertan behera uzteko berehalako epai eskaera egin zuten. Atzo emandako erantzunean, Administrazio Auzitegiak adierazi du «ez dagoela presarik» eta ez dela beharrezkoa prozedura bertan behera uztea. Sakoneko helegitea aztertzeko orduan har lezakeen erabakia ere aurreratu du nolazpait, prozedura guzia «legearen barruan» egin dela adierazi baitu.

«Ez da sorpresa handia, esperantza genuen Administrazio Auzitegiak erabaki hori hartuko zuela, baina arrangura bat gutxiago da», adierazi du Nikolas Blain Batera-ko kideak, erabakiaren berri jakin orduko. Hemendik aitzina, lanerako «konfiantza giro bat» sortzea da haren ustez garrantzitsuena, urtarrilaren 1erako elkargo bakarra martxan egon dadin.

Sakoneko helegitea oraindik aztertua izan ez bada ere, Blainek ez du uste prozedura ahula denik. «Gaurko erabakiak prozedura bera indartzen du. Aferaren larritasuna epaitu behar zuten, bertan behera utzi ala ez erabakitzeko, baina edukiari ere heldu dio epaileak bere argudiaketan, prozedura guzia legezkoa izan dela baieztatu baitu. Aski marka ona da». Blainen arabera, gutxienez sei hilabete beharko ditu Administrazio Auzitegiak sakoneko helegitea aztertzen hasi aitzin. «Anartean, elkargo bakarra sortua izanen da; beraz, atzeraezina izanen da. Ez da sekula horrelako kasurik gertatu; beraz, ikusi beharko da, baina, normalki, ez da desegiten. Gehienez ere egokitzapen batzuk egiteko aginduko du auzitegiak». Frantzian zehar gisa bereko beste helegite batzuk jarriak izan direla ohartarazi du Blainek, guziak ere atzera bota zituztela azpimarratuta.

Mugaz gaindiko lankidetza

Gipuzkoako Foru Aldundiaren iritziz, Ipar Euskal Herriko Hirigune Elkargoaren sorrerak aro berri bat irekiko du mugaz gaindiko lankidetzan. Imanol Lasa bozeramaileak azpimarratu duenez, euskal lurraldearentzat «aitorpena» ekarriko du: «Bultzada berri bat instituzionalizazio prozesuari begira». Aurreratu duenez, Gipuzkoako Foru Aldundiak kontaktuak hasiko ditu Ipar Euskal Herriko ordezkari politikoekin, lankidetzarako aukera berriak aztertzeko, eta sortu den errealitate berriari egokitzeko egiturak lantzeko «Europako testuinguruan». «Lurralde Lankidetzarako Europar Agrupazio bat», aipatu du, besteak beste, aldundiko bozeramaileak.