Euskotreneko langileak Bilboko Zazpikaleetako geltokian bildu dira gaur goizean, lankide bati egindako erasoa salatzeko —uztailaren 27an izan zen, Zurbaranbarriko geltokian—. Ekintza jakin hori salatzeaz gain, arlo horretan aritzen direnek jasan behar izaten dituzten eraso guztiei «erabateko arbuioa» erakutsi diete. Enpresa batzordearen parte diren sindikatuek bat egin dute protestarekin.
Zehaztu dute beraiek «erabiltzaileak informatu eta laguntzeko» lan egiten dutela, eta «erabat onartezina» dela horregatik irainak, mehatxuak edo erasoak jasotzea. Gehitu dute kontziente direla ekintza horiek «erabiltzaileen gutxiengo batek» egiten dituela, halere «kezkagarriak» zaizkie.
Kontzentrazioa egin badute ere, gaurko lanuztera deituta zeuden, ELA sindikatuak erabakita. Astelehenean, baina, bertan behera utzi zuten lanuztea, enpresarekin akordio bat lortu zutelako: azaroaren 3a baino lehen hogei pertsona kontratatzeko konpromisoa hartu du zuzendaritzak.
