Euskaraz kasu egiten ez duten saltokiei isunik ez jartzearen aurka dago EKA

Euskaraz kasu egiteko beharra arautzen duen dekretua betetzen ez duten saltokiei isunik ez jartzearen aurka dago EKA, Euskadiko Kontsumitzaileen Antolakundea. Eusko Jaurlaritzako Hizkuntz Politikarako sailburuorde Lurdes Auzmendi EKAko ordezkariekin bildu zen herenegun, eta bertan azaldu zien Jaurlaritzak ez dituela isun horiek jarriko. Hau da, euskaraz kasu egiten ez duten saltokiak ez dituela zigortuko. Bileran izan ziren, halaber, banketxe, saltoki handi eta energia nahiz telekomunikazio enpresetako ordezkariak. EKAk Jaurlaritzaren erabakia salatu du. «Zigorrak jartzen ez badira, legeak ezerezean geratzen dira. Dekretuan jasotzen dena aholku bat besterik ez da izango».