Euskaltzaindiak erakunde publikoen babesa izango du hitzarmen baten bidez

Eusko Jaurlaritzak eta Arabako, Bizkaiko eta Gipuzkoako Foru Aldundiek hitzarmena sinatu dute Euskaltzaindiarekin. Lau urteko hitzarmena da, 2021-2024ko epealdian indarrean egongo dena, eta erakunde horiek eta Euskaltzaindiak izenpetzen duten mota horretako bosgarren ituna da; lehenengoa 2000-2004ko epealdikoa izan zen.

Akordio horren arabera,Euskaltzaindiak epe horretan 7.760.000 euro inguru jasoko du, «Euskaltzaindiaren lanari eta egindakoaren zabalkundeari bultzada» emateko, betiere «euskara ikertzeko eta zabaltzeko jarduerak» oinarri hartuta. Diru kopuru horretatik Jaurlaritzarena da diru laguntzarik handiena: bost milioi euro baino zertxobait gehiago jarriko du.

Kultura eta Hizkuntza Politikako sailburu Bingen Zupiriak «ezinbestekotzat» jo ditu «euskararen sustapenerako, garapenerako eta zabalkunderako Euskaltzaindiak egiten dituen egitasmoak», eta nabarmendu du «herritarren eskura» jartzen dutela egindako lan guztia. Arabako Foru Aldundiko Lexuri Ugartek, Xabier Arauzo Bizkaikoak eta Garbiñe Mendizabal Gipuzkoako Foru Aldundikoak ere goretsi dute Euskaltzaindiak egindako lana.

Guztiei eskerrak eman dizkie Andres Urrutia euskaltzainburuak. «Hitzarmen honek berresten du erakundeen arteko elkarlana euskararen alorrean. Izan ere, erakunde aholku-emailea da Euskaltzaindia, eta horrek eskatzen du beren-beregiko engaiamendua bere zereginetan», adierazi du.