Jendez bete dira Forondako (Araba) zelaiak EAJren Alderdi Egunean. Han izan dira alderdiko kide eta militanteak, eta baita jeltzaleek gonbidatutako diasporako hainbat ordezkari ere, tartean Gilles Simeoni Korsikako presidentea.
Jetzaleek eguerdian egin dute eguneko ekitaldi nagusia, eta Iñigo Urkullu lehendakariak hartu du hitza. Buruzagi jeltzaleak salatu du lau hamarkada geroago Gernikako Estatutua bete gabe dagoela oraindik: "Aurrera egiten jarraitu behar dugu autogobernu handiagoa lortu eta Europan euskal nazioak pisu handiagoa izan dezan".
Azaroan egitekoak dituzten Espainiako hauteskundeez ere mintzatu da Urkullu, eta gobernabiderik ezari eta ezegonkortasunari egotzi die bozak berriz egin beharra. Horiei aurre egiteko modua konpromisoa, instituzioetako lana eta "politika erabilgarria" direla azpimarratu du buruzagi jeltzaleak.
Andoni Ortuzar EAJko buruak ere hauteskundeak hartu ditu ahotan, eta herritarrei eskatu die ez dezatela etsi; gogoratu du Franco diktadoreak esan ohi zuela bera ez zela politikan sartzen. "Kontuz politikarik ez dagoenean, haren tokia diktadurek eta populismoek hartzen baitute. Ni ere haserre eta nekatuta nago Madrilen gertatzen ari denarekin, baina haserre hori boto abertzale bilakatu behar dugu".
