Etxerat-ek eta Sare Herritarrak mobilizazioak antolatu dituzte Hego Euskal Herriko sei hondartzatan euskal presoak etxeratzeko eskatzeko. Abuztuaren 4an izango dira, 12:00etan, eta Sare Herritarrak lehen aldiz hartuko du parte Etxerat-ek urtero antolatzen duen ekitaldi honetan.
Manifestazioak Bizkaiko hiru hondartzatan eta Gipuzkoako beste hiru hondartzatan egingo dira: Bakion, Laidan, Lekeition, Mutrikun, Orion eta Donostian, hurrenez hurren. Bi elkarteek hondartzak «aldarriz betetzeko» eskatu diete «gazte, heldu eta adindu guztiei».
Gaur egun, 119 preso daude Hego Euskal Herriko espetxeetan, hamazazpi etxean daude preso, eta sei Frantziako espetxeetan –bost Lannemezanen eta bat Reaun–. Horrez gain, hamazazpi erbesteratuta daude, eta beste hiru, deportatuta. Euskal presoen sakabanaketa iazko martxoan bukatu zen.
