Akitania Berriko Osasun Agentziak Celine Blandin emagina lanik gabe utzi zuen astelehenean, etxean erditzen laguntzen zuelarik pazientea berantegi bideratzeagatik ospitalera. Alain Guinamant Eskualdeko Osasun Agentziaren Pirinio Atlantikoetako ordezkaritzako zuzendariak erabakia berretsi du, erabaki horren azaltzeko elementu gehiagorik eman gabe, ordea.
Blandin emaginaren sostenguz sortu den komiteak kontsideratu du «bere lanbidea kontzientziaz, etikaz eta profesionaltasunez egiteagatik» zigortu dutela. Eta etxeko erditzearen praktika defendatu dute: azaldu dutenez, «amatasun gela batean bezain segurua da aukera informatua, gainbegiratua eta arrisku txikiko haurdunaldietan». Datuetan sarturik, erran dute etxean erditzen diren emazteen %10 inguru bideratzen dituztela ospitalera, «askotan prebentzio gisa».
Komiteak salatu du Blandin bezalako emaginak «pertsona arduragabe eta arriskutsu gisa» agerrarazi nahi dituztela, araututako praktika izanik ere. «Alta, ezin dedikatuago dira familiei, emazteen kausari eta gure oinarrizko askatasunei».
Hilabete bakarrean, etxeko erditzeak egiten dituzten hiru emagin utzi dituzte lanik gabe Pirinio Atlantikoetako Departamenduan; sei hilabetean lau dira. Barda, Blandinen sostenguz, elkarretaratzeak egin zituzten 18:00etan Baionako Ospitale aitzinean eta Pauen (Okzitania), Blandin Eskualdeko Osasun Agentzian deitua zela.
Izenpe kanpaina bat eta diru bilketa bat ere abiatu dituzte Blandinek galduko dituen lansarien konpentsatzeko.
