Etxegabeen kontrako neurriak hartu dituzte Baionan

Gizarte talde batzuetan ezinegona eragin du berriak: Jean Rene Etxegarai Baionako auzapezak neurri sorta bat izenpetu zuen iragan ostiralean, «herriko bakearen, segurtasunaren eta ordena publikoaren kontrako elkarretaratzeak murrizteko». Baionako karriketan jende batzuk «agresiboak» direla azaltzen du dokumentuan, eta biztanleak «beldurtuak» direla. Neurriak hartu ditu jendeen eta animalien arteko elkarretaratzeak murrizteko.

«Agresibitate hori usu alkohol kontsumoari lotua zaio. Gainera, animaliak ez dira beti estekatuak, eta horrek biztanleentzako arrisku sanitario bat dakar», dio auzapezak. Jendeen eta animalien elkarretaratzeak «geroz eta sarriago» gertatzen direla kontuan harturik, murrizketak ezarri ditu hiriko gune zenbaitetan.

Goizeko zortzietatik gauerdira arte, «karriken gehiegizko okupazioa» debekatu du, baita «jarririk edo etzanik» egotea ere «ibiltariak trabatzeko arriskua den lekuetan». Bi txakur baino gehiago elkartzea ere debekatu du auzapezak: neurria errespetatzen ez duenari animalia konfiska diezaioke Baionako Polizia Munizipalak. Bestalde, puska zenbait karrikan biltzea legez kanpokotzat jo du; janaria prestatzeko materiala, oihalak hedatzeko materiala eta txakurrak bazkatzeko tresnak, besteak beste. Horrez gain, gogoan izatekoa da Etxegaraik beste iragarpen bat egin zuela iragan astean: beste sei udal polizia lanerako hartuko ditu.

Neurri horiek kexa eragin dute. Baionako herritar kolektibo batek salatu du «etxegabeen kontrako diskriminazioa» egiten zuela auzapezak neurri horien bidez. «Hautu politiko bat da, eta jadanik prekaritatean bizi den populazio bat jartzen du jomugan, estigmatizatuz». Agiriaren ezeztatzea galdegiteko, eta etxegabeen elkartasunez, ostegunean herriko etxearen aitzinean biltzeko deia egin dute, Pobreen kontra egin ordez, pobreziaren kontra egin dezagun! lelopean. «Karrikaren gehiegizko okupazioa» eginen dute, sinbolikoki. 16:30ean eman dute ordua, eta gauera arte luzatuko dute ekintza. «Segurtasunaren norgehiagokak, gune anti-pobreen sorrerak eta pobreziaren trataera penala errefusatzen ditugu. Baionako Herriko Etxeari presioa egin behar diogu», aldarrikatu dute. Molde berean, etxegabeen harrera guneak indartzeko eskatu dute. Gaur egun, eguneko harrera gune bakarra dago; laguntzaileekin funtzionatzen duena. Gaua pasatzeko zentro batzuk ere badaude BAM Baiona-Angelu-Miarritze eremuan, baina toki eskasa gertatzen da maiz.

Miarritzen ere jomugan

Maider Aroztegi Miarritzeko (Lapurdi) auzapezak jakinarazi du etxegabeen eguneko harrera gunea hiriaren erdialdetik kendu nahi duela, eta beste leku batera eraman. Oraingo egoitzan, bortizkeria jasaten duten emakumeentzako leku bat ezarri nahi du.

Etxegabeen harrera egoitzan, arazo anitz gertatu dira azken hilabeteetan; behin baino gehiagotan mehatxuak jaso ditu etxegabeez arduratzen den Zuekin elkarteak. Biztanleak kexu dira, Aroztegiren erranetan: «Egunean etxe horretan egoten dira, baina arratsetan atera behar dute. Hala ere, auzo berean egoten dira, eta biztanleria trabatzen dute», haren arabera. Hortaz, lekualdatzeko proposamena egin du.

Oraingoz, Atherbea elkarteak —gizarte langintzan ari den elkarte bat— ez du izan lekualdatzearen eta proiektu berriaren berririk.