Etxebizitzaren negozioaren aurka eta etxebizitzarako eskubide unibertsalaren alde manifestatzera deitu du Euskal Herriko Etxebizitza Sindikatu Sozialistak. Mobilizazioa Donostian izango da, larunbatean. 12:00etan abiatuko da, Bulebarretik, eta leku berean amaituko da. Etxebizitzaren negozioari ez eta Enpresari zein politikarien eskutik ez da irtenbiderik etorriko izango dira manifestazioaren leloak.
Gizartean etxebizitzaren inguruko kezka handia dagoela eta, erakundeetako eta alderdietako ordezkariak iragartzen ari dira zenbait proposamen, neurri eta laguntza etxebizitzaren arazoari aurre egiteko. Horrekin kritiko azaldu da Euskal Herriko Etxebizitza Sindikatu Sozialista, haren iritziz politika horien helburua ez delako herritarrentzako konponbideak bilatzea, baizik eta higiezinen negozioa indartzea. Horretarako diru publikoa erabiltzea gaitzetsi du.
Izan ere, administrazio publikoak sustatzen ari diren neurrien izaera «faltsua» dela uste du sindikatuak. Haren ustean, «sinetsarazten digute arazoa eskaintzaren eskasiatik datorrela, eta, beraz, horren konponbidea eskaintza sustatzea dela eta merkatu hori erakargarriagoa eta errentagarriagoa bihurtzea dela». Baina abiapuntua bera okerra dela diote. Sindikatuak argudiatu duenez, «higiezinen merkatua errentagarrienetako bat da, eta, horregatik, gero eta espekulatzaile eta jabe gehiagok interesak dituzte hartan». Eta horrek, hain zuzen ere, larriagotu du etxebizitzaren arazoa, berekin ekarri baititu, «prezioen igoera, etxegabetzeen gorakada, maizterren babes juridikorik eza eta desokupazio enpresen gorakada».
«Higiezinen merkatua errentagarrienetako bat da, eta, horregatik, gero eta espekulatzaile eta jabe gehiagok interesak dituzte hartan»
EUSKAL HERRIKO ETXEBIZITZA SINDIKATU SOZIALISTA
Halaber, mugimendu horrek salatu duenez, neurri sozial gisa aurkezten dituzten arren, «enpresaburuen eta jabeen aldeko neurriak» dira. Adibide batzuk eman dituzte: errentatzaileentzako diru laguntzak, zerga salbuespenak jabeentzat eta eraikuntza sektorearen finantzaketa publikoa.
Manifestazioaren antolatzaileen ustez, etxebizitzaren arazoa konpontzeko modu bakarra da bizilekuak behar sozialen arabera planifikatzea eta etxebizitzek merkantzia izateari uztea.
Egoera bidegabe hori salatzeaz gain, aldarrikapen zehatzak egingo dituzte larunbateko protestan: etxegabetze guztiak etetea, etxebizitzak merkatzea, desokupazio enpresak desagerraraztea, turistifikazioaren aurkako neurri eraginkorrak hartzea, eta kalitatezko etxebizitza doako eta unibertsala bermatzea.
Bilbokoaren jarraipena
Iazko abenduaren 14an Bilbon egindako manifestazioaren jarraipena izango da Donostiakoa. Orduan ere aldarrikapen berberak egin zituzten etxebizitzaren sindikatuek. Manifestazio hari babesa eman zioten berrehundik gora eragilek, eta milaka lagunek bete zituzten Bilboko kaleak.
Larunbateko manifestazioak ere kolektibo eta norbanako ugariren babesa jaso du. Bazterketa soziala eta etxebizitzaren arazoa lantzen duten eragileak daude tartean, hala nola Berri-Otxoak, Argilan-ESK, Bizilagunekin Donostia eta Meta Etxebizitza Taldea. Horretaz gain, atxikimendua adierazi dute, besteak beste, Fridays for Future, Sare Antifaxista, Emakume Aske eta Borrokalariak eta Euskal Herriko Kontseilu Sozialista kolektibo politikoek ere.
Suhiltzaileek, etxegabetzeetan parte hartzeari uko
Nafarroako Etxegabetzeen Aurkako Suhiltzaileen Plataforma sortu berriak ere babesa adierazi dio manifestazioari. Adierazi dutenez, kezkatuta daude ikusita nola larritzen ari den etxebizitzaren arazoa, eta uko egiten diote etxegabetzeak egiteari.
Larunbateko deialdiarekin bat egiteko kaleratu duten oharrean azaldu dute etxebizitzaren arazoari aurre egiteko bizilagunen alde jarri behar dutela, «espekulatzaile ekonomikoen aurrean». Beste suhiltzaileei eskatu diete antolatzeko eta etxegabetzeetan suhiltzaileak eta haien baliabideak erabiltzearen kontra borroka egiteko.
