Etorkinek eta arrazializatuek etxebizitza eskuratzeko «zailtasun izugarriak» dituztela salatu dute kolektibo ugarik

Migratzaileek eta arrazializatuek modu «are gordinagoan» pairatzen dituzte etxebizitza krisiaren ondorioak, arrazakeriaren aurkako eta etxebizitza arloko hogei eragile baino gehiagok salatu dutenez. Filtro arrazisten aurkako eta etxebizitzarako sarbide unibertsalaren aldeko manifestua kaleratu dute gaur goizean, Gasteizen egin duten agerraldian. «Premiazkoa da errealitate hori salatzea».

Esan dute migratzaileek eta arrazializatuek etxebizitza bat eskuratzeko «zailtasun izugarriak» dituztela. Izan ere, «diskriminazio praktika sistemikoak» pairatzen dituzte, hau da, izenagatik, azentuagatik edo larruazalaren koloreagatik, etxebizitza bat erosteko edo alokatzeko aukera ukatu egiten zaie, manifestuaren arabera. Ondorioz, «etxebizitza eskasak» eta «gehiegizko alokairuak» besterik ez zaizkie geratzen. Eta horrek ekarri du alokairuari aurre egiteko etxebizitzetan jende asko pilatzea, edo, kasurik larrienetan, kalean bizi behar izatea. 

Erantzuleak ere identifikatu dituzte: «eskaintzak ezkutatzen dituzten edo lortu ezin diren baldintzak eskatzen dituzten higiezin enpresak; kaudimen ekonomikoa izan arren hipotekak ukatzen dituzten bankuak; kriminalizatzen eta baztertzen duten administrazioak, zeinek erroldatzeko eskubidea ere ukatzen duten; eta bizitegi prekaritatetik ateratzeko alternatiba errealik eskaintzen ez duten gizarte zerbitzuak». Etxejabeen aurka ere hitz egin dute. «Jazarpen egoerak ohikoak» direla esan dute, eta etxetik botatzeko mehatxua «etengabea» dela.

Etxebizitza eskubide unibertsalaren aldeko eta higiezinen negozioaren aurkako manifestazioaren atarian egin dute agerpena. Gaur zortzi izango da manifestazioa, Donostian. Mobilizatzeko deia egin dute. «Antolatu eta borrokatu egin behar da, ez bakarrik etxebizitzaren negozioaren aurka, baizik eta baita arrazismoaren aurka eta pertsona guztiek kalitatezko etxebizitza izateko aukera izan dezaten ere».