EAJren EBBko presidentetza hartuta, karguari dagozkien lanei ekin die gaur Aitor Estebanek. Lan horietako bat zera izango da, Andoni Ortuzarrek gainerako alderdiekin autogobernu berriaren inguruan hasitako elkarrizketei heltzea. Prozesu horren inguruan, Estebanek esan du aukera leiho bat zabalik dagoela, baina kontuan hartu behar direla balizko zailtasunak ere: «Bidea oso luzea izango da, eta ez dugu obsesionatu behar».
Ikusi gehiago
Estebani ez zaizkio berriak egingo azken hilabeteetako elkarrizketetan hizpide izan dituztenak. Radio Euskadin egindako elkarrizketan azaldu duenez, Ortuzarrek besteak beste EH Bilduko eta PSE-EEko buruzagiekin egindako bileretan izan ez bada ere, aritu da jorratu diren gaien inguruko «paperekin» lanean: «Ez naiz kanpoan egon».
Hala, Estebanek auziari heltzeko asmoa azaldu du, baina behin eta berriz adierazi du bidea ez dela «erraza» izango. Hain zuzen, uste du prozesuan zailtasun gutxien izan ditzakeen elementua Araba, Bizkai eta Gipuzkoan akordio bat ixtea izango dela beharbada.
Beraz, litekeena da gatazka Madrilen egotea, gehiengoak aldakorrak baitira han. Esaterako, PPk Gernikako Estatutua betetzearen kontra erakutsi duen jarrera aipatu du, eta gogoratu estatutu berri bat eginez gero Espainiako Senatuak aztertu beharko lukeela; han Alderdi Popularrak du gehiengoa. Ziurrenik, Auzitegi Konstituzionaletik ere igaro beharko luke, helegiteren bat tarteko. Milaka zailtasun topatu ditzaketela esan du Estebanek: «Ezin zaio jendeari esan hau eginda dagoela».
Afera nazioarteko testuinguruarekin ere lotu du, eta esan du agian indar gehiago egin behar dela «hurrengo hamarkadako Europan leku bat» izateko estatu mailako eztabaidan baino.
AHTaren lotuneaz ere galdetu diote Estebani, alderdi barruan dituzten tirabirei erreparatuta. Hark adierazi du erabakia hartzeko «marra bat» egin beharko balitz, motzena Ezkiokoa (Gipuzkoa) litzatekeela, baina gehitu du beste afera askori ere erreparatu behar zaiela. Hala, hitza Espainiako Gobernuak duela esan du, haren ardura baita beharrezko azterketak egitea.
Lehen bilkura
Alderdi barrura begira, berriz, Estebanek nabarmendu du mundua aldatzen ari dela, eta EAJk ezin duela ez ikusiarena egin. Hala, alderdiaren ibilbidea goraipatu duen arren, «esentzia» hori egokitu egin behar dela adierazi du: «XXI. menderako prestatu. Mekanika batzuk iraungita geratu zaizkigu». Besteak beste, adierazi du alderdiaren organoen arteko interakzioa hobetzeko asmoa duela, baita alderdiaren eta erakunde publikoen artekoa ere.
EBB berriak gaur egingo du lehen bilkura, eta hartan, besteak beste, erabakiko dute nork ordezkatuko duen Esteban bera Espainiako Kongresuko eledun karguan. «Edonor dela ere, oso ondo egingo du. EAJk jendea izendatzen du haiengan konfiantza duelako», esan du, izenik aurreratu gabe.
Bilerako beste egitekoetako bat zera izango da, burukide berrien lan banaketari erreparatzea. Estebanekin batera, beste zortzi burukide ere izendatu baitituzte asteburuan: Maitane Ipiñizar, Joseba Diez Antxustegi, Markel Olano, Manu Tejada, Andoni Busquet, Miren Martiarena, Javier Ollo eta Ion Ganbra.
Horiei lurraldeetako buru batzarretako presidenteak batuta, EBB hamar gizonek eta lau emakumek osatuko dute. Estebanen esanetan, emakume gutxi egotearen arrazoia alderdiaren barne hautaketarako sistema da, eta azaldu du presidente gisa lan egingo duela «ardura postuetarako izen femeninoak bultzatzeko».
Estebanek adierazi du denak direla bere konfiantzako kideak, baina ez du aurreratu zer lan izango duen horietako bakoitzak. EBBko eledunaren rola berreskuratuko ote duten galdetuta, ez du baiezkorik edo ezezkorik eman, baina esan du alderdiak «gehiago transmititu» behar duela, eta «profil ideologikoa» zehaztu. Izan ere, uste du transmisio horren pisua instituzioen esku utzi dela, baina horiek ez direla alderdiaren ordezkaritza hutsak.
«Ohorea»
EBBko presidente berriak garrantzia kendu nahi izan die Antena 3 telebista katean egindako adierazpenei. Haren hitzetan, EBBko presidentetza hartzea «ohorea» izango litzatekeela adieraztean, edozein alderdikidek emango zuen erantzuna ematen ari zen: «Erantzun klasikoa eman nuen». Hala, adierazi du «harritu» egin zuela bere izena Gipuzkoan mugitzen hasi izanak.
Uste du aldaketa nahi baten ondorio izan zela, nahiz eta aitortu duen berak ez duela aldaketa ideologikorik ordezkatzen. Eta, behin aldaketa eginda, batasunerako garaia dela gehitu du: «Uste dut oinarrizko printzipio bat dela aurrerantzean ere erreferente izan nahi badugu, eragin handiko eragile izan nahi badugu».
