Esparza izango da berriro ere UPNko presidentea

IRUÑEA. Jose Javier Esparzak jarraituko du UPNko presidentetzan, alderdiko afiliatuek haren alde bozkatu eta gero hamabigarren kongresuan. 2.631 pertsonak zuten botoa emateko eskubidea, eta horietatik 1.774k eman dute (%67,42). Horien artean, %58,29k egin dute Esparzaren alde, eta %41,71k Sergio Sayas diputatuaren alde.

Esparzak azaldu du alderdia «indartuta» aterako dela kongresutik: «Indarra eta konfiantza emango digu etorkizunean lanean jarraitzeko». Gainera, balioa eman dio alderdiak azken urteetan eginiko bideari eta zuzendaritzarako duen taldeari; tartean daude Enrique Maia Iruñeko alkatea eta Yolanda Ibañez alderdiko idazkari nagusia. Are, Sayasen hautagaitzaren aurkezpena ere gogoan izan du; adierazi du «zilegi» dela, baina ez zela «garaia».