Espainiako Kongresuak ikasketa artistikoen legea onartu du gaurko osoko bilkuran. Horren bidez, ikasketa hauek arautuko dituzte: musika, dantza, arte dramatikoa, ondasun kulturalen kontserbazioa eta zaharberritzea, arte plastikoak, zirkua, idazkera sortzailea eta ikus-entzunezko arteak. Azken hiru horiek berriak dira.
Osoko bilkuran, PPren 11 zuzenketa eta EH Bilduren zuzenketa bat onartu dituzte, eta aurrera egin du legeak. Hala, goi mailako ikasketa artistikoak arautuko dituzte, baita ikasketa horiek eskaintzen dituzten ikastetxeak eta irakasleen jarduna ere. Legean jaso dituzte ikasleen eskubideak eta betebeharrak ere, eta ikasketa horiek unibertsitate mailakoekin parekatu dituzte. Hauek dira, besteak beste, testuan jasotako berritasun nagusiak:
berrikuntzak
Lehenengoz aitortu dituzte ikasketatzat ikus-entzunezko arteak eta idazkera sortzailea, eta goi mailako ikasketa horiek beste diziplina batzuetara irekitzeko aukera ere aipatu dute.
Langabezia akademikoa aitortu dute, unibertsitate sistemaren legeak egiten duen bezala.
Ikasleek Europako Batasuneko gainerako herrialdeetako ikasleen berme berdinak edukiko dituzte, titulazioak aitorpen eta homologazio berdina edukiko dituelako.
Praktiketan ari diren ikasleek Gizarte Segurantzan kotizatuko dute, Lanbide Heziketakoek egiten duten bezala.
Ikasleek bekak unibertsitateko ikasleen baldintza berdinetan jasoko dituzte.
Behin legea onartuta, gogobeteta agertu da Pilar Alegria, Espainiako Gobernuko Hezkuntza ministroa: «Merezi izan du, lege honek gaur egungo ikasketak hobetuko dituelako eta XXI. mendeko eskaeren mailan jarriko dituelako».