Eusko Jaurlaritzako Segurtasun Sailak jakinarazi duenez, goizaldean 31 urteko gizon bat hil da Gasteizko diskoteka bateko sarreran, eta Ertzaintzak dantzalekuko atezainetako bat atxilotu du. Arabako hiriburuko Bakea kalean dago diskoteka. 04:53an SOS Deien larrialdi zerbitzuan jaso duten dei baten arabera, 31 urteko gizonezko bat lurrera erori da dantzalekuko atarian, eta konorterik gabe geratu.
Europa Press albiste agentziaren arabera, lurrean zen gizonak bihotzekoa izan du, eta osasun zerbitzuetako langileak bere onera ekartzen saiatu badira ere, han bertan hil da. Ertzaintzak ikerketa bat hasi du zer gertatu den argitzeko, eta dantzalekuko atezainetako bat atxilotu du, heriotzarekin zerikusia izan duelakoan.
Euskadi Irratiak jakinarazi duenez, lekukoek azaldu dute ez dela borrokarik izan bien artean, eta atezainak dantzalekura sartzea eragotzi nahian kolpe bat eman, eta lurrera bota duela 31 urteko gizona.
