Iragarri baino minutu batzuk lehenago hasi da Voxen Loiolako mitina. Ertzaintzak auzoko sarbide gehienak itxi eta hesitu ditu, segurtasun neurri zorrotzekin. Latsarien plazaren inguruetan bizi diren bizilagunek oihuekin eta zaratekin hartu dituzte Vox alderdiko kideak, Javier Ortega Smith Voxeko idazkari nagusia buru zutela. Loiolako kuartelen ondotik etorri dira.
Voxen mitinean hogeita hamar bat lagun elkartu dira. 19:50ean hasi da ekitaldia, eta, minutuek aurrera egin ahala, protesten bolumenak gora egin du. Hainbat lagun plazaren inguruetara hurbildu dira, eta mitinak iraun bitartean oihuka aritu dira. Besteak beste, «Alde hemendik, utzi bakean!» gisako leloak oihukatu dituzte.
Eskuin muturreko alderdiaren hitzaldiak 15 minutu baino ez du iraun.
Ertzaintza oldartu egin da antifaxisten aurka, Voxeko kideei bidea zabaltzeko. Istiluetan zaborrontzi bati su eman diete manifestari batzuek. Ertzainek bi pertsona atxilotu dituzte.
Oihuak eta txistuak geroz eta gehiago dira Loiola auzoan, Voxen mitina ez da entzuten @irutxulopic.twitter.com/h2m6ThV5l3
— Inaxio Esnaola Aranzadi (@inaxioesnaola) July 3, 2020
