Donostian ertzain bat atxilotu dute, emaztea hiltzen saiatzeagatik. El Diario Vasco egunkariak zabaldu duenez, gizonak bi alaba adingabeen aurrean eraso zion larunbat goizaldean, baina emakumeak etxetik ihes egin eta laguntza eskatzea lortu zuen. Erasotzaileak sukaldeko labana handi bat erabili zuen. Dena den, aske utzi dute, zenbait kargu leporatuta.
Bi alabek ez dute lesio fisikorik, baina tentsio uneak izan ziren, aita haietako batekin itxi zelako etxean. Azkenean, lortu zuten atxilotzea; hilketa saiakera egotzi diote, eta Ertzaintzak ikertzeari ekin dio zer gertatu zen argitzeko.
Lehen hipotesien arabera, eztabaida baten ondorioz haserretu zen bikotekidea, eta, emaztea zenbait alditan mehatxatu ostean, gizonak labana bat hartu zuen. Labanaz egin zion eraso emakumeari, hark haur bat besoetan zuela, baina emakumeak ihes egitea lortu zuen, negar gasa erabilita. Beste alaba, neskatila txikia hura ere, etxean geratu zen. Emakumeak Martuteneko espetxea zaintzen duten ertzainengana jo zuen laguntza eske. Goizaldeko laurak ziren.
