«Errelebo garaia» dela nabarmendu dute gaur EHU Euskal Herriko Unibertsitateko komunikazio iturriek, eta aldaketa baten berri eman dute: EHUren Udako Ikastaroen zuzendaritza akademikoa Idoia Otaegik hartuko du. Sei urte egin ditu ardura postu horretan Itziar Alkortak. Gaur bi emakumeak batera azaldu dira, eta argazkiak egin dituzte ikastaroak antolatzen dituen fundazioaren patronatuko kideekin eta EHUko errektore Joxerramon Bengoetxearekin.
Donostian jaioa da Otaegi, 1968. urtekoa. Nazioarteko Zuzenbide Pribatuko irakaslea da EHUn. Ardura postuak izan ditu aurrez ere erakundeetan; Eusko Jaurlaritzan, Nafarroako Gobernuan, eta EHUn bertan. «Arduraz eta ilusioz» hartu du langintza berria, eta eskertu egin du beregan jarri duten konfiantza.
Esker on hitzekin utzi du zuzendaritza postua Alkortak. Zuzenbide Zibileko irakasle eta ikertzailea da, eta langintza horietan jardun osoz murgiltzeko era izango du orain.
«Erreleboa» osatze aldera, EHUko errektoretza talde berriko kideek ere hartu dute haien aurrekoen lekukoa fundazioaren patronatuan.
