EH Bilduk biharko egindako deialdiarekin bat egin dute ERCk, BNGk, CUPek, Compromisek, Mes Per Mallorcak eta Comunistes de Catalunyak. Horietako ordezkaritzak izango dira bihar Bilbon, Nazioa gara lelopean egingo den manifestazioan.
Marta Rovira idazkari nagusiak ordezkatuko du ERC; Ruben Cela nazioarteko harremanetarako arduradunak, BNG. Susana Moreno, Berta Ramis eta Carles Soler izango dira CUPen ordezkariak; Veronica Ruiz, Carla Nebot eta Vincent Marza Compromisekoak; Lluis Apesteguia Mes Per Mallorcaren izenean; eta Nora Sanchez eta Hector Sanchez Comunistesen izenean.
Euskal nazioaren aitortza eta errespetua aldarrikatuko dituzte bihar, Bilbon. Euskal herritarrek euren etorkizuna erabakitzeko eskubidea dutela aldarrikatuko dute, eta estatutuei buruz datozen eztabaidei «anbizioarekin» heltzeko eskatuko dute.
