Sanantonioak ospatu dituzte Errezilen (Gipuzkoa) asteburuan, baina, festa artean, eraso homofobo bat jasan du herriko bikote batek. Ostiral gauean gertatu zen, 22:30 aldera: bikotekide diren bi gizonezkok eraso homofobo bat jasan zuten beren bizitokian. Herriko nerabe batzuek txirrina jo zieten, atea behartu, eta leihora herriak bota; «espainol zikinak» eta «marikoiak» oihukatu zieten, gaztelaniaz. Erasoa egin zuten nerabeek aurpegia estalita zeramaten, eta indarkeriaz aritu ziren, Errezilgo Udalak jakinarazi duenez.
Bikoteak aurrez ere jasan izan du jazarpena, erakundearen esanetan: etxeko txirrina jotzera joan izan zaizkie, baina ostiraleko erasoa «gogorragoa» izan zela adierazi dute. Udalak berak, festa batzordeak eta protokolo lantaldeak salatu dute gertaturikoa «larria» dela, eta ez dutela herrian inolako eraso homofobo, matxista edo baztertzailerik onartuko. Urola Erdialdeko Itaiak gaitzetsi du «LGTB kolektiboak egunerokoan bizi duen biolentziaren beste adibide bat» dela jazotakoa, eta erasoei aurre egin beharra nabarmendu du.
Festen antolatzaileek babes eta elkartasun osoa adierazi diote bikoteari, baita dituzten beharrei erantzuteko prestasun osoa ere. Oraingoz, ez dute erasoa salatzeko elkarretaratzerik antolatu.
