Entitateak Euskaraldian parte hartzera deitu dituzte

Ahobizi eta belarriprest. Aski ezagunak dira Euskaraldiko bi rol horiek; alabaina, norbanakoek ez ezik, entitateek ere parte har dezakete Euskaraldian; enpresa, elkarte, denda, taberna eta antzekoek. Hizkuntza ohiturak aldatzeko eremu seguruak sortzeko bidea da askorentzat; alegia, euskaraz gehiago, gehiagorekin eta gehiagotan egiteko eta horretarako modua emateko. Entitateek Euskaraldian parte hartzeko dituzten egitekoak eta prozesuak xehatu dituzte gaur goizean Euskaraldiaren antolatzaileek, Donostiako San Telmo museoan eman duten prentsaurrekoan.

Maiatzaren 15etik 25era izango da IV. Euskaraldia, eta dagoeneko «milaka eta milaka» entitatek bat egin dute. Falta diren horiei pausoa emateko eskatu diete, animatzeko eta euskararen erabilera sustatzeko: besteak beste, lantokiei, kirol eta kultur elkarteei, dendei nahiz tabernei egin diete dei. Horretarako, www.euskaraldia.eus webgunean sartu beharko dute, eta bertan izango dute eskura informazio guztia.

Izan ere, Euskaraldian entitateek ere badute beren zeresana eta zeregina, aurreko bi aldietan ikusi denez. Halakoetan ariketa sozialak duen eragina «oso garrantzitsua» da, Euskaraldiaren koordinatzaile Goiatz Urkijoren irudiko: «Entitateak herritarrak batzen garen guneak izaten dira: lantokiak, aisialdi elkarteak, dendak, komertzioak, tabernak... eta horietan ere euskararen erabilera areagotzea ezinbesteko erronka da». Kanpora begira eta barrura begira: «Bertako kide askorentzat, entitatea da euskaraz hitz egiteko duten eremu bakarra».

Jarduera eremu horri dagokionez, heldu den Euskaraldian egongo da berrikuntzarik. Urkijok azaldu duenez, III. Euskaraldia amaitu zenean «gogoeta prozesu sakon bat» abiatu zuten, «ariketaren ahulguneak eta indarguneak identifikatzeko», ariketaren eraginkortasunean urratsak egiten jarraitzea xede izanda. Entitateen proposamenaren inguruan ere gogoetatu zuten, eta, Urkijoren arabera, atera dituzte irakaspenak: ezin dutela berdin jokatu herriz gaindiko eta tokiko entitateekin, edo entitate txikiekin eta handiekin.

Gainera, aurreko bi aldietan, Euskaraldian parte hartzeko ariguneak sortzea eta aktibatzea proposatu zieten entitate den-denei. «Herriz gaindiko entitate eta entitate handi askorentzat proposamen eraginkorra izan zen ariguneena, euskararen erabileran urratsak egiten jarraitzeko; beraiek hala adierazi ziguten. Baina, aldi berean, ariguneen proposamena zailagoa zen herri mailako arigune txikiagoek ezartzeko, proposamen anbiziotsua zen, eta herri batzordeentzat ere lan zamatsua zen ariguneen proposamena azaltzea». Ikusi dute entitate txikietan arigunearen rola txapa janzteak berak ordezka dezakeela, eta ariketa berdin-berdin izan daitekeela eraginkorra.

Horregatik guztiagatik, aurtengoan, entitate bakoitza nahi duen doinuan eta neurrian arituko da; hots, bakoitzak erabakiko du nolako ariketa egin nahi duen, eta ez dituzte ezinbestean ariguneak sortu beharko. Hori bai, «oinarrizko egiteko batzuk» ezarri dituzte guzti-guztientzat: kideei Euskaraldiaren inguruko informazioa helaraztea, Euskaraldian eroso aritzeko prestakuntza eskaintzea eta ariketa ikusgarri egitea.

Harago joan nahi dutenek ere izango dute modua, lanketa «sakonagoa» egiteko era: «Bestelako urratsak egitea hautatzen dutenei euskararen erabilera sustatzeko aurrerapausoak ematea proposatuko diegu, hala nola ariguneak sortzea, bilerak euskaraz egiteko neurriak hartzea, mintzatratuak adostea...». Horretarako, Euskaraldiko kideek laguntza eskainiko diete entitateei.