Kepa Anabitarte (Pasaia, Gipuzkoa, 1934) Trintxerpe auzoan hazi zen, familia euskaldun eta abertzale batean. ELA sindikatuan militatzeagatik eduki zuten preso, eta, askatu ostean, ELA Berri taldeko arduradun izan zen. Kooperatibismoan ere aritu zen, Nabarraldeko bultzatzaileetako bat izan zen, Orreaga iritzi taldearen sortzaileetako bat ere bai, eta, besteak beste, Gaindegiaren sorreran parte hartu zuen.
Anabitarteren bizi ibilbidearen bidez Euskal Herriko azken ehun urteetako kronika politikoa harilkatu du Eneko Bidegainek. Liburu batean jaso du haren bizitza: Kepa Anabitarte. Bizitza bat herriari eskainia.
Anabitartek bere bizi ibilbidean ezagututako erreferentziazko pertsonek eta hark bizi izandako gertakari politiko, ekonomiko eta kulturalek ontzen dute kronika. Anabitarteren pentsamendu politikoaren oinarriak ere jaso ditu liburuan Bidegainek.
