Auzoan Bizi etxebizitza sareak etxegabetze bat geldiaraztea lortu du Gasteizen, Arana auzoko Extremadura kalean. Emakume bat eta haren alaba adingabea etxetik kaleratzeko bertaratu da Ertzaintza. Emakumeak hipoteka bat zuen Laboral Kutxa bankuarekin, eta 2007tik bizi da bota nahi izan duten etxebizitzan, Auzoan Bizik jakinarazi duenez.
Etxegabetzea 12:30ean zuten egitekoa, baina dozenaka lagun bildu dira eraikinaren atarian, Auzoan Bizi sarearen deialdiari erantzunez, kaleratzea eragoztera. Ertzaintza han bildutakoei oldartu zaie, eta, etxera sartzen saiatzen ari zela, epaileak etxegabetzea atzeratzea erabaki du. Auzoan Bizik iragarri du mobilizazioetara deituko duela beste etxegabetze agindu bat ematen dutenean.
Hemen etxegabetze saiakeraren bideoa:@AuzoanBizi-k mobilizazio gehiago iragarriko dituela adierazi du, etxegabetze data berria heltzean. pic.twitter.com/SbHUc22muW
— Arabako ALEA (@ArabakoALEA) November 21, 2024
Etxebizitza eskubidea aldarrikatu du sareak, eta hura errespetatzeko eskatu. «Etxebizitza merkantzia den artean, ez da eskubide izango». Salatu du eskubide hori gauzatzeko eragozpen direla «ordaindu beharra, filtro arrazistek etxebizitzarako sarbidea zailtzea, etxejabeen gehiegikeriak, bankuen eta putre funtsen interesak eta boterea». Azaldu dutenez, gaur etxegabetzen ahalegindu diren emakumea lanean ari da, baina, hala ere, ezin dio hipoteka gastuari aurre egin.
Laboral Kutxaren jokabidea ere gaitzetsi dute, «oinarrizko behar batekin negozioa» egin nahi izateagatik.
Manifestazioa, abenduaren 14an
Etxebizitza eskubidearen aldeko manifestazio nazionalera deitu dute, besteak beste, Euskal Herriko Etxebizitza Sindikatuen Sareak eta Euskal Herriko Etxebizitza Sindikatu Sozialistak. Abenduaren 14an dute egitekoa, Bilbon. Etxebizitza eskubidea bermatu, negozioari ez! lelopean abiatuko da, 13:00etan, Plaza Eliptikotik.
