Emakume bat hil da gaur arratsaldean Lerinen, NA-122 errepidean izan den trafiko istripu batean. Hildakoak 82 urte zituen, Azagrako bizilaguna zen, eta beste bi emakumerekin batera zihoan autoan. Ibilgailua bidetik irten eta irauli egin da.
Foruzaingoak azaldu duenez, 17:00 inguruan gertatu da ezbeharra, Lizarra eta Andosilla (Nafarroa) lotzen dituen errepidearen 17. eta 18. kilometroen artean, Lerin parean. Istripua izan duen autoa Lizarrarako bidean zihoan, eta bihurgune batean bidetik irten da.
Nafarroako larrialdi zerbitzuek eskatuta, suhiltzaileak eta Foruzaingoa joan dira ezbeharra gertatu den lekura.
Hil den emakumea gidariaren ondoan zihoan, eta ibilgailu barruan gelditu da harrapatuta. Suhiltzaileek atera behar izan dute autotik. Haren gorpua Nafarroako Auzitegi Medikuntzako eta Zientzia Kriminalistikoetako Institutura eraman dute, autopsia egiteko.
Beste bi bidaiariak anbulantzian eraman dituzte Lizarrako ospitalera. Gidaria da bata, 48 urtekoa; bestea, autoaren atzealdean zihoan. Hildakoaren ahizpa da, haren adin berekoa.
Gidaria harekin zihoazen adineko bi emakumeen zaindaria da, eta alkohol eta drogen kontrola egin dio Foruzaingoak. Emaitza negatiboa izan da.
Azken lau egunetan Nafarroako errepideetan izan den hirugarren heriotza da Leringoa. Igandean, Lodosan, 79 urteko gizon bat hil zen haren autoa bidetik irtenda, eta, asteartean, furgoneta batek 63 urteko txirrindulari bat harrapatu zuen Etxaurin.
