D&S Desokupa eta Horus Desokupa enpresak Antsoaingo Berria plazan (Nafarroa) izan ziren atzo, etxegabetze bat egiten: emakume bat kaleratu zuten. Antsoaingo Gazteak mugimenduko Beñat Remon Retak kontatu du emakumea gizarte zerbitzuetan dagoela jakin dutela, baina ez dakite askoz gehiago.
Remon bertan zen atzo. Azaldu du gazte batzuek Desokupakoak kalean aurkitu zituztela, eta gazte mugimendutik egin zutela jendea etxe atarira gerturatzeko deia. «Dozenaka» lagun bildu ziren etxe parean, eta «Faxistak kanpora!» oihukatu zieten, KLAK Gazte Ahotsaren X kontuak zabaldu duen bideoan entzun daitekeenez. Arratsaldeko sei eta erdi edo zazpiak aldera izan zen, Remonek kontatu duenez.
#KLAKtualitatea 🗞️ ~ ‼️Desokupa talde faxista Antsoaingo Berria plazan izan da, foralek babestuta. Bertaratu diren bizilagunek aurre egin diete eta polizia kargak izan dira. 🚨 pic.twitter.com/PGqFOILtVw
— KLAK Gazte Ahotsa (@egin_klak) January 23, 2025
Istiluak sortu ziren foruzainen eta bizilagunen artean. Antsoaingo Gazteek salatu dute foruzainek Desokupakoak «babestu» zituztela: «Etxeko atarian geratu ziren». Desokupakoak etxe barrura sartu zirela ere jakin dute. «Desokupa enpresako kideak etxetik jaitsi zirenean, foruzainen babesarekin, bizilagunek herritik kanporatu ahal izan genituen». Oldarraldi txiki batzuk ere egin zituztela ziurtatu du Remonek.
Espainian ezaguna da Desokupa enpresa. Okupatutako etxeak husten dituzte «bortxaz eta modu oldarkorrean», hainbat elkartek salatu izan dutenez. Remonek azaldu du Desokupakoek ez zutela ezer egin bere horretan, baina iruzkinak bota zituzten: «Ikusiko duzue ehun etortzen garenean...».
Uztailean ere bai
Ez da emakume hau etxetik botatzen saiatu diren lehen aldia. Uztailean ere joan ziren Espainiako bi enpresa horietako kideak etxe berera. Etxegabetze hori egiteko joan ziren Antsoainera orduan, eta atzo ere bai. Uztailean ere jakin zuten, baina ez zen hainbeste jende gerturatu. Ez zuten lortu emakumea kaleratzea.
