Nafarroan hedatuta dago PAI Ingelesez Ikasteko Programa; horren ondorioz, ingelesezko eskolez gain, beste irakasgai batzuk ere hizkuntza horretan ematen dituzte. Alabaina, zenbait ikastetxek PAItik ateratzeko baimena eskatu diote Nafarroako Gobernuko Hezkuntza Departamentuari. Horietako bi dira Garesko eta Elizondoko eskola publikoak. Iragarri berri dutenez, departamentuak baiezkoa eman die, eta datorren ikasturtetik aurrera ez dira PAIn egongo.
Horrenbestez, erran.eus hedabidearen arabera, Elizondoko ikastetxea berriro ere D eredukoa izango da —euskara hutsezko eredua, gaztelera eta ingelesa irakasgai izanda—. 2009an ezarri zuten PAI-D, «ikasleen ingelesa indartzeko helburuarekin», baina atzera egin dute orain, «ikasleen profila aldatu eta eskola publikoan D eredua logikoena dela ikusita». Garesen, berriz, orain arte PAI-G, PAI-A eta PAI-D eskaintzen zituzten.
