Elhuyar hiztegiak 25 urte bete ditu, webgune eta 'app' berriarekin

Elhuyarren ikurretako batek, Elhuyar hiztegiak, 25 urte bete ditu aurten, eta, hori ospatzeko, hiztegia kontsultatzeko webgunea eta gailu mugikorretarako aplikazioa berritu ditu Elhuyar fundazioak. 1996an hasi zen euskara-gaztelania hiztegi elebiduna Euskal Herriko ikastetxe, liburutegi eta etxeetako apalategietan lekua hartzen, eta erreferente izan da geroztik, bai euskaraz lan egiten duten profesionalentzat, bai euskara ikasten eta irakasten ari direnentzat ere.

25 urteotan, papereko edizio bat baino gehiago izan du euskara-gaztelania hiztegiak, eta geroago euskara-frantsesa eta euskara-ingelesa hiztegiak gehitu zaizkio. 1999an, paperetik digitalerako saltoa egin zuen, eta, 2013tik, kontsultak hiru hiztegietan batera egin daitezke, ordenagailuen eta beste tresna mugikorren bidez.

Hiztegiak 25 urte bete dituela ospatzeko, webgunea eta gailu mugikorretarako aplikazioa berritu ditu orain Elhuyarrek; diseinu moderno eta berritzailea emateaz gain, kontsulta sistema erabilerrazagoa gehitu dio, eta hiztegiko sarrerak Interneteko adibide errealez hornitu, Dabilena web-corpusen atariari esker.

Interneten Elhuyarren hiru hiztegi elebidunak kontsulta daitezke: bilaketak euskaraz eginda hiruretako emaitzak batera ikusteko aukera eskaintzen du. Era berean, kontsultagai daude fundazioak euskaraz egoki idazten eta hitz egiten laguntzeko argitaratzen dituen gomendioak.

Halaber, gaurtik hasita, pertsona ezagunek hiztegiari buruz helarazitako mezuak plazaratuko ditu Elhuyarrek sare sozialetan. Hala, kanpainari hasiera emateko, Jon Abril Elhuyarreko koordinatzaile nagusiaren, Itziar Gastearenaren, Kike Amonarrizen, Aitziber Garmendiaren, Iñaki Alegriaren eta Ilaski Serranoren hitzak sareratu zituen atzo fundazioak.