Aurkeztu dute Gipuzkoako ikastolen aldeko festa: Elgoibarren izango da, 2025eko urriaren 5ean. Zer leloren bueltan arituko diren ere aukeratu dute: Salto-saltoka. Logoa, berriz, sokekin osatuta dago: «Euskarara salto egiteko babesa eta gonbidapena izan nahi duten sokekin osatuta dago 2025eko Kilometroak jaiaren irudi berria».
Olatz Astigarraga ikastolako Kontseilu Errektoreko lehendakariordeak —lehendakaria izango da hurrengo urtean— eman ditu jaiaren inguruko xehetasunak. Ziurtatu du bi helburu nagusi izango dituela: «2025eko Kilometroak jaia antolatzeko aukera baliatu nahi dugu gure herrian eragiteko: lan egingo dugu elkarlana eta euskararen erabilera areagotzeko». Xedeetan sakondu du gero. Azaldu du nola eragin nahi duten euskararen erabileran, elkarlanari bide emanda: «Urte honetan, nahi dugu elkarri laguntzea euskara hautatzen. Nahi dugu denontzat ere errazagoa izan dadin euskarara salto egitea. Eta, horretarako, lagundu egin beharko diogu elkarri; elkarren babesean, lortuko dugu salto hori egitea. Elkarri soka emanda, elkarri soka luzatuta».
Dagoeneko diseinatu dute festarako arropa ere. Abenduaren 5ean irekiko duten saltokian egongo da erosgai.
