Bilbo ezkerraldean mobilizazio eguna izan da gaurkoa. Ehunka lagun bildu dira, eta, besteak beste, honelako aldarrikapenak oihukatu dituzte: «Gora, gora, gora langileon borroka», «Ez, ez, ez murrizketarik ez», eta «Ezkerraldean bizi eta lan». Lau ziren beren salaketa nagusiak: prekaritatea, gastu militarra, bizitzaren garestitzea eta hainbat familiak hilabete bukaerara iristeko dituzten zailtasunak. Horrez gain, Palestinarekiko elkartasuna ere presente izan dute manifestazioan, eta «Boikot Israel, Palestina askatu» eta «Ez da gerra bat, genozidio bat da» oihuak entzun dira bertan.
Sestaotik Santurtzira (Bizkaia) bitarteko martxa egin dute, hainbat plataforma ekologistak, antimilitaristak eta sindikatuk –ELA, LAB, Steilas, ESK, CNT eta CGT-LKN– deituta. «Langile klaseak zera behar du: bizitzak erdigunean jartzea, etxebizitza duin baterako eskubidea bermatzea, hezkuntza eta osasun sistema publiko eta kalitatezkora sarbidea izatea, zaintza sistema publikoa izatea, eta pertsona guztientzako duinak izango diren soldatak eta pentsioak jasotzea», gehitu dute. Alde horretatik, erran dute «kapitalari aurre egingo» diotela pertsona guztiek «bizitza duinak» izatea lortu arte.
«Pobreziaren kriminalizazioa» ere hizpide izan dute, eta azpimarratu horren adibideak egunero ikusi ahal direla «gizarte laguntzak jasotzen dituztenen etxeetan». Hortaz, herritar guztiendako «errespetua, duintasuna eta eskubideak bermatzea» eskatu dute.
Gainera, eskatu dute zaintza sistema «erantzukide» bateranzko bidea egiten hasteko, zeina, haien ustez, «publikoa, unibertsala eta doakoa» izan behar den. «Ezin gara etxeko langileez ahaztu, zeinak prekaritatearen eskalan ondoriorik handienak pairatzen dituzten; ezinbestekoa da haien lan eskubideen alde egitea», borobildu dute.
