Ehunka herritar FNren aurrean

Ehunka lagun elkartu ziren atzo arratsaldean Baionan, Fronte Nazionalak Frantziako presidentetza hauteskundeen harira antolatu zuen ekitaldiaren kontra. Oihu, txistu eta harrabots artean egin zieten harrera FNko kideei, eta manifestari batzuek arrautzak, bengalak eta petardoak ere bota zituzten. Elkarretaratze bukaeran, Polizia oldartu egin zitzaien manifestariei, eta bost zauritu eragin zituen gomazko pilotaz. Horietako bat anbulantzian eraman zuten.

Eskuin muturreko alderdiak 20:00etarako deitua zuen ekitaldia Baionako Lauga aretoan, Marion Marechal Le Pen FNko diputatuaren parte hartzearekin.Kanpoan, 18:30ean hasi zen jendea elkartzen. Dozenaka eragile politiko, sozial eta sindikalek egina zuten protestarako deia, eta irudi hori erakutsi zuen atzoko elkarretaratzeak: adin, ingurune eta kolore ezberdinetako jendetza. Fronte Nazionaleko kideak Lauga aretora iristen ziren bitartean, «alde hemendik!» oihuekin, irainekin eta txistuekin egin zieten harrera protestara etorritako herritarrek.

«Hau da Fronte Nazionalari ematen ahal diogun erantzunik onena», adierazi zuen Beñat Gachen Les Bascos LGBT elkarteko buruak. «Hemen gaude balio batzuk defenditzen ditugulako eta balio horiek zalantzan jartzen dituelako Marion Marechal Le Penek. Jendea bata bestearen aurka jarri nahi du, eta gu elkartasunaren alde gaude». Abortu eskubidea eta homosexualen ezkontza eskubidea debekatu nahi dituela salatu zuen, besteak beste, Gachenek. Ildo beretik jo zuen Bizi! mugimenduko Mattin Ihidopek. «Fronte Nazionalak garraiatzen dituen ideiak dira bestearekiko beldurra, bestearekiko mugak ematea... Eta arrunt kontrakoa da egin behar dena». Aldaketa klimatikoak eta gerlek etorkin jario handiak eraginen dituztela iragarri zuen Ihidopek, eta elkartasunerako deia egin zuen.

«Ez da ongi etorria»

Elkarretaratzearen deitzaileen artean zen EH Bai koalizio abertzalea. Ekainean iraganen diren legebiltzarrerako hauteskundeetan hautagai izanen den Laurence Hardouin abokatuak gogor egin zuen Fronte Nazionalaren kontra: «Guretzat, faxismoa oroitarazten duen alderdi bat da, zatitzailea, estigmatizatzailea, xenofoboa... Zerrenda luzea da. Argi dena da, ez dela Euskal Herrian ongi etorria den alderdi bat. Gure balore guzien aurka doa». Fronte Nazionalaren ideien kontra egin zuen Aitzina gazte antolakundeko Koldo Etxegaraik ere. «Ez dugu onartzen FN Baionara etortzea, eta ez dugu onartuko haien ideiak Euskal Herrian hedatzea. Gaurko irudia biziki polita da, gazte anitz eta gazteria mota anitz etorri baita; belaunaldi eta ingurune anitzetako jendea. Erantzun izugarria da».