Beste hainbat norbanakok eta elkartek egin duten eran, EHU Euskal Herriko unibertsitateak ere hartu du erabakia: X sare soziala utziko du. Hauxe unibertsitate publikoak eman duen arrazoia: «Plataforma horrek azkenaldian hartu duen norabidea unibertsitatearen balio etikoen eta demokratikoen kontrakoa da».
Ohar batean xehatu dutenez, agerian geratu da sare sozialeko informazioaren «kalitate eta egiatasun falta». Eta iruditzen zaie unibertsitate batek bestelako joera izan behar duela: «Unibertsitate gisa, gure ardura da errespetuan eta egiazkotasunean oinarritutako komunikazioa indartzen duten guneak sustatzea; alegia, pentsamendu kritikoa bultzatzea». Ordea: «X sare sozialak ez du hori bermatzen».
Erabaki horrekin EHUk bat egin du CRUE Espainiako Unibertsitateetako Errektoreen Konferentziaren ebazpenarekin.
