EHKS Euskal Herriko Kontseilu Sozialistak ekainaren 7an mobilizatzeko deia egin du, Europako Parlamenturako bozen kanpaina amaierarekin batera. Ohar batean azaldu dutenez, Europako Batasunaren eta NATOren aurka egingo dute protesta, Donostian; 19:00etan, Bulebarrean. Deialdiak bat egiten du Kontseilu Sozialistak «abstentzio aktiboaren» alde egindako deiarekin. «Abstentzioa ez delako benetako alternatiba bat borrokaren eta mobilizazioaren eskutik ez badator», zehaztu du Garazi Navarro EHKSko eledunak.
Kontseiluak argudiatu du Europako Batasunaren agenda eta programa politikoa «gerran zein austeritatean» oinarritzen direla, eta Europako Parlamenturako bozak hura legitimatzeko tresna direla. Sare sozialetan zabaldutako bideo batean, Navarrok adierazi du EBk «aurrekontu militarren igoera eta askatasun politikoen murrizketa» sustatu dituela, eta «palestinarren aurkako genozidioa zuritu» eta «sionismoa armatu» duela. Dena, «NATOren aginduei jarraituz».
Bestetik, batasunaren programak «bankarien eta enpresari handien interesei» erantzuten diela salatu du EHKSk, eta austeritate politiken bitartez «langileen pobretze etengabea» eragiten duela: «Hori ez da aldatuko ekainaren 9ko hauteskundeetan».
