Auzitegiak Bidegiren auziko kereila zabaltzea onartu eta gero, erabaki horren inguruko balorazioa egin du EH Bilduk: "Zantzu penalak baieztatzen badira, eta orain arte atera diren datu guztiek horretara garamatzate, kontzienteki eta era planifikatu batean garai hartan Bidegiren arduradun politiko nagusiek diseinatutako iruzur erraldoi baten aurrean gaude".
Markel Olano zen Gipuzkoako ahaldun nagusi, eta Eneko Goia Bide Azpiegituretako diputatu. Bien jarrera "onartezina" dela uste du koalizioak: "Ez dute argitzen zer gertatu zen orain dela lau urte Bidegin". Ildo horretan, "azalpenak emateko garaia" dela ohartarazi die EH Bilduk.