Aurpegi berri asko gaur Sabin Etxean, eta ez hain berriak ere bai. EAJren asteburuko Batzar Nagusian izendatutako Euzkadi Buru Batzarrak lehen bilera egin du, Bilbon, eta bat egin dute zuzendaritzatik atera direnek eta sartu berriek, familia argazkia egiteko. Imanol Pradales Eusko Jaurlaritzako lehendakaria ere gehitu zaio taldeari. Argazki horretan gizonak izan dira gehienak, nabarmen. Fotoa atera ostean, bazkaria izan dute, Batzar Nagusien ondoren ohi den bezala. Alderdiak oraindik ez du jakinarazi EBBko kide bakoitzak zer ardura izango dituen.
Beraz, Aitor Esteban buru izango duen taldeak hasia du Donostiako Atano III.ean onartutako txosten politikoak gauzatzeko ibilbidea. Etxe barrura begira, zuzendaritza berriak badu lana Estebanek berak Anoetako pilotalekuan oso argi azpimarratu zuen «batasun» hori gauzatu dadin; alegia, EBBko presidente berriak nahi du alderdiko askotariko ahotsek barne kohesioa erakustea eta mezu bateratuak helaraztea. Modu horretan, amaiarazi egin nahi ditu AHTaren harira eta barne prozesuak iraun duen epean sektore kritikoak egindako kritikak eta horren harira izan diren kontraesanak. Kanpora begira, EAJk eskaintza doitu behar du, nagusitasun politikoari eusteko helburuz mezua berritu, eta, hain zuzen, onartu berri diren txosten politikoak erreferentzia izango dira horretarako.
Horietako batek «erabakitzeko eskubideari» erreparatzen dio, azken hilabeteetan estatus berriari buruz zabaldu den eztabaidari lotuta. Esteban hasia da bere zigilua jartzen zenbait arlotan, eta jada nabari dira ñabardura batzuk haren aurrekoak, Andoni Ortuzarrek, gaiari buruz orain arte esandakoekin alderatuta. Ez beharbada nazio aitortzari eta haren ondorio juridikoei begira, baina bai presidente berriak, estatus berriaren helburuekin lotuta, nabarmen azpimarratutako zuhurtzia mezua dela eta: «Bidea oso luzea izango da, eta ez dugu obsesionatu behar», ohartarazi du.
Ortuzarren baikortasunik gabe
EBBko buru gisa eman duen lehen elkarrizketan, Estebanek gogoratu du Madrilen dagoela oztopo nagusia. Nabarmendu du gehiengoak «aldakorrak» direla han, eta iradoki egungo Espainiako Gobernua ez dela betiko. Igandean Atano III.ean egin zuen hitzaldian ere, garbi adierazi zuen EAJk ez zituela alferrik galduko autogobernuan aurrera egiteko zabaltzen diren aukerak, baina, buruzagitza hartu orduko, Esteban aldendu egin da Ortuzarrek azken elkarrizketan helarazi zuen baikortasun horretatik, eta zuhurtzia aipatu du estatus berriaren helburuari dagokionez.
«Uste dut EAJk, EH Bilduk eta PSOE-PSEk behar besteko konfiantza lortu dugula. Uste dut denentzako gauza on bat lortuko dugula. Irudikatzen genuen horrek hortik joko du», esan zuen joan den astean Ortuzarrek. Orain, Estebanek oniritzia eman beharko dio bere aurrekoak Arnaldo Otegirekin eta Eneko Anduezarekin estatus berriari buruz hitz egindakoari, eta ez du ematen Ortuzar bezain baikor denik.
Gaur bertan EH Bilduren Eusko Legebiltzarreko eledun Pello Otxandianok mezu argia bidali du burujabetzaren auziaren inguruan. Esan du «garai historiko berri batean» gaudela, eta «tresna juridiko eta politiko berriak» behar direla oraingo erronkei aurre egiteko, «gure herria babestu eta indartzeko, eta nazioa eraikitzeko eta instituzionalizatzeko prozesuaren jarraipena bermatzeko». Horretarako, «ezinbestekotzat» jo du «jauzi politiko bat egitea»; «eta horrek esan nahi du estatus juridiko eta politiko berri bat lortu behar dela herriaren parte honentzat». Hala, berretsi du «legealdi honetan» egin behar dela jauzi politiko hori: «Akordio bat egin behar dugu estatus politiko berri bati buruz, gure nazioak hauskor izateari utz diezaion».
