«Sionismoaren konplize, Palestina askatu!». Hori diote bart gauean EAJren eta PSE-EEren zenbait egoitzatan agertu diren pintaketek eta eskuorriek. Israelen konplize izatea egotzi diete bi alderdiei, eta Palestinaren alde mobilizatzeko egin duten deia «hipokrisia» dela salatu dute.
Gernika-Palestina plataformak astelehenean herri guztietan egingo dituen elkarretaratzeen bezperan agertu dira salaketak. Mobilizazio horiekin bat egin dute EAJk eta PSE-EEk.
«Palestinarekiko elkartasunarekin batera, ezinbestekoa da Israelekin eta sionismoarekin konplizitateak dituzten alderdi politikoak seinalatzea. Horienganako presioa handitzeko garaia da. Ez diezaiegun aurpegia garbitu!», diote pintaketen inguruan botatako eskuorriek.
Salatzaileek azaldu dute zergatik aurpegiratzen dieten hori. Eusko Jaurlaritzari, zehazki, leporatu diote Israelekin harreman diplomatikoak izatea, «okupatutako lurraldeak lotzeko trenak egiten ari den» CAF enpresako akziodun izatea, eta Ertzaintza Israelen trebatzea eta zaintzarako teknologia hango enpresei erostea. Ertzaintzak Israelgo institutu, unibertsitate eta segurtasun enpresekin dituen harremanak zerrendatu dituzte.
Bizkaiko Foru Aldundiak Shin Bet zerbitzu sekretuekin hitzarmen bat sinatu duela ere salatu dute.
Harremanak eten
PSE-EEri dagokionez, gogora ekarri dituzte Pedro Sanchez Espainiako Gobernuko presidenteak aurtengo maiatzean esandakoak: «Israel herrialde laguna da, eta ahalik eta harremanik onena izan nahi dugu harekin».
Besteak beste, arbuiatu egin dute Madrilek iaz Israeldik suziriak inportatzeko sinatu zuen 285 milioi euroko akordioa, eta gogorarazi dute Espainia dela EB Europako Batasunetik Israelera gehien esportatzen duten herrialdeetako bat. «2023ko azaroan, Israelek EBtik inportatu zuenaren %57 Espainiatik inportatu zuen», gehitu dute.
Horregatik guztiagatik, EAJri eta PSE-EEri eskatu diete Israelekin dituzten harreman guztiak eteteko.
