Maiatzean X. batzarra egin zuen Askagintzak Hernanin (Gipuzkoa). «Geldiune garrantzitsua izan zen aurrera begiratzeko», Iragik dioenez. Sortu zenetik «ekintza eta esku-hartze ugari» egin ditu Askagintzak eta, 20 urte pasa ostean, hausnarketa burutu du, egindakoaz eta egiteke dagoenaz. Iragiren ustez, «Askagintzaren ibilbidea positiboa izan da, batik bat, herri erakunde izaera galdu gabe, lan profesionala egiteko erronkari eutsi diolako».
Sorrerako helburuak eta xedeak mantentzen ditu Askagintzak, Iragiren esanean: «Droga mendekotasunen fenomenoa normalizatzearen alde aurrera egin nahi dugu; gu ez gaude drogen kontra, kontsumo arduratsua zabaltzearen alde baizik». 70eko hamarkadan agertu zen droga mendekotasunen fenomenoa Euskal Herrian eta, harrezkero, asko aldatu dira kontsumitzeko moduak eta ohiturak. Askagintzak ere erralitate aldakor horretara moldatu behar izan duela jakinarazi du Iragik. Esate baterako, alkohola kontsumitzeko ohiturak aldatu egin direla eta azkenaldian gai horrekin arduratuta dabiltzala adierazi du.
Orain arte egindako lanari jarraipena emango dio Askagintzak, osasun heziketan, prebentzioan eta salaketan. Aurrerantzean ere, elkarlana sustatzeak garrantzi berezia izango du, Iragiren ustez: «Sarea osatzea, herri erakundeekin, instituzioekin, guztiok batera lan egiteko, garrantzitsua da». Maiatzean egin zuten hausnarketa herri eta auzo guztietara zabalduko dutela jakinarazi du Iragik, udazkenetik aurrera. «Gogoak ematen digun arte lanean jarraituko dugu, sustatuz, bilduz eta parte hartuz».
