Donostiako Udalak ez du euskararik eskatuko bi zuzendari postutan

Donostiako Udaleko zuzendari izan nahi duenak udal langilea izan behar du, eta euskara maila jakin bat egiaztatu —hirugarren hizkuntza eskakizuna edo C1a, normalean—, besteak beste. Hala ere, hori arautzen duen legeak badu salbuespen bat, eta Donostiako udal gobernuak baliatu egin du. Hain zuzen, udaleko osoko bilkurak «erabaki arrazoitu baten bidez» zehaztu dezake zuzendari postu bat udal langilea ez den norbaiti ematea; halakoetan, funtzionarioek bete behar dituzten baldintzak bertan behera geratzen dira, baita hizkuntza eskakizunak ere. LAB sindikatuak salatu du udalak salbuespenezko prozedura hori ireki duela Osasun eta Ingurumen zuzendaria eta Pertsonen Kudeaketarako zuzendaria izendatzeko. «Udal gobernuak ez du bermatzen apetaren arabera izendatuko dituen zuzendari horien euskararen ezagutza», salatu du LABek.

Udalak oraindik ez du iragarri zeintzuk izango diren zuzendari horiek, baina, LABek ohartarazi duenez, ez dute euskaraz jakin beharko. «Azken hiru hamarkadetan udal langileen euskalduntzearen esparruan eginiko ahaleginak zapuztuko dira, zuzendari ez-euskaldun batek euskaldundu diren langile guztiak espainolez lan egitera derrigortzen dituelako», nabarmendu du LAB sindikatuak, ohar baten bidez.

Ekonomia, Tokiko Enplegu eta Ekologia zinegotzi ordezkariak—PSE-EEko Marisol Garmendiak— eta Pertsonen, Kudeaketa Ekonomikoaren eta Aurrekontuen zinegotzi ordezkariak—EAJko Kerman Orbegozok— egin dituzte ja bi zuzendari horiek salbuespenezko prozeduraren bitartez izendatu ahal izateko justifikazio txostenak, LABek esan duenez. Udaleko osoko bilkurak onartu beharko ditu.

Donostiako Udaleko LAB sindikatuko Sail Sindikaleko kide Joseba Alvarezek azaldu du udal langile bat barne sustapenaren bidez zuzendari bihurtzen bada erretiroa hartu arte egoten dela postu horretan. Erantsi du, ordea, ez dela gauza bera gertatzen udal langile izan gabe zuzendari bihurtu direnekin; agintaldiak irauten duen aldian baino ez dute betetzen zuzendari postua. Alvarezek azaldu du Osasun eta Ingurumen zuzendaria eta Pertsonen Kudeaketarako zuzendaria erretiroa hartzekoak direla, eta haien postuak betetzeko barne sustapeneko prozesu bat abiatu beharrean —kasu horretan, postuari dagozkion eskakizun guztiak bete beharko lituzkete hautagaiek— salbuespenezko prozedurari ekin diotela.

«Kanpoko norbait sartu daitekeenez gero, udal barruko langileek kanpotik dakarten norbaitekin lehiatu behar dute. Gainera, kanpotik datorrenak ez ditu baldintza horiek bete behar. Barne garapenerako arazo bat da horrela jokatzea, eta zuzendaria ez denez postuaren jabe egingo, ez da egonkortuko zuzendaritza postu hori postu organiko gisa», gaitzetsi du Alvarezek.

Hizkuntza eskakizunak

Nabarmendu du salbuespenezko prozeduraren bidez hautatutako zuzendariak ez dituela hizkuntza eskakizunak bete behar, eta horrek eragina izan dezakeela zuzentzen dituzten sailetako hizkuntza ohituretan: «Donostiako Udalak 30 urte pasatu ditu langileak euskalduntzen; azkenean, langileak euskaldundu dira; eta, adibidez, Osasun eta Ingurumen sailean eta Pertsonen Kudeaketakoan langile askok eta askok hirugarren edo laugarren hizkuntza eskakizuna daukate. Bat-batean, haien arduradun zuzena izango den eta euskaraz ez dakien zuzendari bat jar diezaiekete gainetik. Orduan, automatikoki, hierarkiaren eta barne funtzionamenduaren arabera, euskarazko funtzionamendu guztia oztopatu egiten da. Zergatik? Arduradun nagusiak ez daukalako hizkuntza eskakizunik».

Gaur egun, Pertsonen Kudeaketarako Sailean, erretiroa hartzear den zuzendariak badaki euskaraz; are, badauka hirugarren hizkuntza eskakizuna, eta haren menpe dauden langile gehienek ere bai, Alvarezek azaldu duenez: «Udaleko betiko langileak dira, euskaldunduz joan direnak. Sailak ez du euskara hutsez lan egiten; hori esatea gehiegi litzateke. Baina ez dute inolako arazorik euskaraz funtzionatzeko».

Ingurumen Sailean, berriz, orain arte zegoen zuzendariak ez zekien euskaraz; «ez zuen ulertzen ere», Alvarezek zehaztu duenez. Saileko langile gehienek euskara menperatzen dutela adierazi du, baina, zuzendariak ez zekienez, lan funtzionamendua erdalduna izan dela orain arte. «Ingurumen Sailean, arazo larria izan da zuzendariak euskaraz ez jakitea, eta orain, zuzendari berriari euskara eskatzeko aukera dagoen honetan, kontrako bidea egin dute», gaitzetsi du Alvarezek.