Donibane Lohizuneko Le Miam ostatua bost egunez hetsirik egon da. Osasun neurriak ez errespetatu izana leporatu zion Pirinio Atlantikoetako departamenduko prefeturak abuztuaren 7an, eta bost eguneko itxialdia ezarri zion zigor gisa. Neurria errespetatu, eta gaur ireki ditu berriz ateak.
Osasun neurriak ez errespetatzeagatik hesten duten hirugarren ostatua da departamenduan, uztailaz geroztik. Frantziako Poliziaren arabera, jabeak ostatua berantegi hesten zuen gauez, eta maskara ez zuen aski erabiltzen barnean. Uztailaren 19 eta 20aren arteko gauean, Frantziako Polizia ostatuan sartu zen, 02:40etan hamabost lagun inguru edaten ari baitziren, eta hetsia behar zuen 02:00etan.
