Herribiltza taldeak batzarra egin zuen azaroaren 6an Donibane Garazin. Frantses hutsean zeuden edo frantsesa nagusi zuten seinaleak kendu zituzten orduan, eta Pirinio Atlantikoetako Departamenduari ohartarazi zioten «seinaleetan lehentasuna eta nagusitasuna euskarari eman arte» lanean jarraituko dutela, «euskara bigarren mailako hizkuntza gisa tratatzen duten bide seinaleen taulak kentzeko». Saio hartan kenduriko seinaleak gaur agertu dira, Portugalete parean (Bizkaia).
Agiri baten bidez, zergatia azaldu du taldeak. Euskara, beste hizkuntzak bezala, munduko ondarea dela adierazi dute. Gogoratu dute Unesco Hezkuntza, Zientzia eta Kulturarako Nazio Batuen Erakundeak adierazi duela «funtsezkoa» dela «munduko ondare kulturala babestea». Euskarak pairatzen duen zapalketa ilustratzeko datu batzuk eman dituzte, eta «2016tik 2021era ezer gutxi aldatu» dela adierazi.
«Frantziar eta espainiar Estatuen konstituzioek eta legeek ez dute begirunerik euskararentzat, euskara gutxiesten dute, eta Euskal Herrian bigarren hizkuntza gisa tratatzen dute». Frantziako eta Espainiako agintariei egotzi diete Unescoren aginduaren kontra egitea. «Euskararen iraupenerako ez dute eztabaida irekirik egiten; aldiz, euskarari eraso egiten diote, eta hura hiltzen ari dira. Unesco egoera honen aitzinean mutu egoten da. Gizateriaren ondare kulturala den euskara hiltzen uzten ari da; aldiz, Portugaleteko Bizkaiko Zubia gizateriaren ondare izendatu du».
Amaitzeko, «mundu osoari» laguntza eskatu diote «Euskal Herrian, lehenik eta nagusiki euskaraz! aldarrikapena gauzatzeko».
Kolektibo independentea
Euskal Herri osoko erakunde independente eta burujabe gisa definitzen du bere burua Herribiltza kolektiboak.
Iazko urrian, frantses hutsezko beste seinale bat utzi zuten Pirinio Atlantikoetako Departamenduak Baionan duen egoitzaren aurrean. Jean-Jacques Lasserre departamenduko presidenteak erantzun zien euskarazko seinaleak «toleratzen» badituzte ere ez dutela «araudiaren araberako baliorik». Eta ohartarazi zien panelak kentzeagatik sala zitzakeela.
Uzkurtu beharrean urrats gehiago egingo zituela iragarri zuen Herribiltzak.
Herribiltzaren ustez, ordea, euskararen egoera larriaren harira, «ezinbestekoa da karrikako presentzia» indartzea. «Euskal Herrian euskaraz bizitzeko aukera ukan nahi dugu; hau da, gure eguneroko jarduera guziak euskaraz egiteko aukera ukan nahi dugu». Horiek horrela, euskararen etorkizuna bermatzeko «urrats berriak» egingo ditu Herribiltzak, adierazi zutenez.
Horrez gain, hiru eskari egin zituen taldeak: herriko etxeek galdeketak egitea herrien euskal izena ofizial bihurtzeko; herrien izenak euskaraz eta frantsesez berdintsuak direnean, seinaleetan bakarrik euskaraz jartzeko –Araban, Bizkaian eta Gipuzkoan araututa dagoen bezala–, edo, ezberdinak direnean, euskarazkoa gainean paratzeko; azkenik, ahozkoan «lehenik eta nagusiki» euskarazko izena baliatzeko.
