Arbasoen etxeetako ateak nork irekiko dizkien irrikan daude AEBetako euskal diasporako 33 gazte. Udan etorriko dira Euskal Herrira, Gipuzkoako Goierrira hain zuzen, eta hiru asteko egonaldia egingo dute, Ateak Ireki programaren bidez. 16 eta 25 urte bitarteko gazteak dira, horietatik gehientsuenak Kalifornian dute bizilekua, baina badaude Washington, Colorado, Nevada eta Oregon ingurukoak ere. Ezaugarri batek batzen ditu denak: euskal jatorria duten familietakoak dira.
Batzen dinamikak berreskuratu zuen egitasmoa duela hiru urte, NABO Ameriketako Estatu Batuetako Euskal Elkarteekin batera, 1970eko hamarkadan Renoko eta Boiseko unibertsitateek bultzatu zituzten antzeko egonaldiak gogoan.
Ikusi gehiago
Aldi berri honetan, hirugarren urtez jarraian egingo dute joan-etorriko bidaia AEBetako gazteek. Aurtengoan, 46k eman dute izena, eta horietatik 33k izango dute Euskal Herria ezagutzeko aukera, ekainaren 28tik uztailaren 20ra bitarte.
Ikusi gehiago
Egitasmoaren arduradunak Goierriko eta inguruko udalerrietako familien bila ari da, programaren hiru asteetan gazte horiek etxean har ditzaten. Interesa dutenek izena eman dezakete ateakireki.eus webgunean edo ateakireki@ateakireki.eus helbide elektronikoaren bidez.
Harremanak josi
Hiru aste horietan, AEBetako gazteek euskara ikastaroak jasoko dituzte Lazkaoko Maizpide barnetegian. Horrez gain, Euskal Herriko Unibertsitatearekin elkarlanean, Udako Ikastaroetako euskal dantzari buruzko mintegian parte hartzeko aukera izango dute; halaber, euskal kulturari buruzko tailerrak egingo dituzte, eta egun osoko irteerak antolatuko dituzte.
Hori asteko lanegunetan. Asteburuetan, berriz, denbora gehiago izango dute familiekin egoteko, bertakoekin «harreman sareak» josteko, Adur Ezenarro Ordiziako alkate eta Goieki Goierriko Garapen Agentziako lehendakariak nabarmendu duenez.
Aurten, gainera, bi berrikuntza daude. Batetik, Euskal Herrira etorri aurretik euskara eskolak jasoko dituzte gazteek; eta, bestetik, Goierriko bizpahiru gazteri aukera emango diete AEBetan egonaldia egiteko.
Iñaki Goirizelaia Batzen elkarteko lehendakariaren arabera, iaztik ari dira joan-etorriko programa hori diseinatzen, eta asmoa da etorkizunean AEBetako gazteei ez ezik mundu zabalean dauden gainerako euskal komunitatekoei ere zabaltzea Euskal Herrira etortzeko aukera.
Ateak Ireki programak Eusko Jaurlaritzaren, Nafarroako Gobernuaren, Arabako, Bizkaiko eta Gipuzkoako aldundien, Goieki, Maizpide eta NABOen babesa du, besteak beste.
